Fréttakerfi

Þorsteinn Víglundsson, þingmaður Viðreisnar, segir ríkisstjórnina sækja að hinum einkarekna hluta heilbrigðiskerfisins og hefur áhyggjur af því að skilvirkni sé ekki nægileg í ríkisrekinni heilbrigðisþjónustu. Þetta sagði hann í umræðu um fjármálaáætlun ríkisstjórnarinnar á fimmtudag. „Útgjöld eru ekki markmið í sjálfu sér. Útgjaldaaukning er ekki markmið í sjálfu sér, heldur hvað fáum við fyrir fjármagnið og hvernig er skilvirkni ríkisrekstrarins fyrir okkur, og þar hef ég töluverðar áhyggjur af skilvirkni heilbrigðiskerfisins,“ sagði Þorsteinn.

Tveir sérfræðilæknar, sem báðir fengu synjun um aðild að rammasamningi Sjúkratrygginga Íslands fyrir sérfræðilækna, segja núverandi fyrirkomulag bitna á sjúklingum og koma í veg fyrir nýliðun innan læknastéttarinnar, þrátt fyrir alvarlegan læknaskort. Þá sýnir þróun síðustu ára fram á að sérfræðilæknar, sem náð hafa 60 ára aldri, vinna sífellt hærra hlutfall af heildarvinnu innan stéttarinnar. Læknafélag Íslands hefur lýst yfir þungum áhyggjum af ástandinu.

Í Morgunblaðinu í dag 8. júní 2018 birtist grein eftir Stefán E. Matthíasson formann heilbrigðisfyrirtækja og Þórarinn Guðnason formann Læknafélags Reykjavíkur. Í greininni segir m.a.: “Sérfræðiþjónusta lækna hefur um áraraðir verið kjölfesta góðrar læknisþjónustu hér á landi. Á síðasta ári tóku sérfræðilæknar á rammasamningi við Sjúkratryggingar Íslands á móti um 500 þúsund heimsóknum. Þeir framkvæmdu meðal annars um átján þúsund skurðaðgerðir og þúsundir speglana auk margskonar lífeðlisfræðilega rannsókna. “ Enn fremur kemur fram í greininni að: “Um 350 læknar starfa á samningnum í ýmsum sérgreinum. Til viðbótar eru um 300 önnur stöðugildi fagfólks í ýmsum greinum. Enda þótt starfsemin sé afar umfangsmikil er athyglisvert að hún tekur einungis til sín um 6% af heildarútgjöldum til heilbrigðisþjónustunnar. Sér¬fræðiþjón¬ust¬an er ein-fald¬lega vel rek¬in, ódýr miðað við í ná¬granna¬lönd¬um og með gott aðgengi sjúk¬linga. Gæðin þarf eng¬inn að draga í efa. Það er vand¬séð annað en að hér sé vel farið með hverja krónu skatt¬fjár¬ins”.Greinina í heild sinni má lesa á:

Reynir Arngrímsson, formaður Læknafélags Íslands, segir að ekki sé hægt að veita þá þjónustu á Landspítala sem sé í boði á einkareknum stofum utan sjúkrahúsa. Til þess sé ekki aðstaða. Lokun rammasamnings sé því ákvörðun um að ríkið greiði ekki fyrir þjónustu sem þörf sé fyrir. Reynir sagðist á Morgunvaktinni á Rás 2, ekki gera athugasemd við að heilbrigðisráðherra vilji byggja upp þjónustu á göngudeild við Landspítala Íslands. Hann finnur hins vegar að því að skrúfað hafi verið fyrir rammasamning sérfræðilækna, þannig að fleiri læknar komist ekki inn á samninginn.

Stjórn Læknafélags Íslands lýsir í ályktun þungum áhyggjum af stöðu sérhæfðrar heilbrigðisþjónustu utan sjúkrahúsa. Stjórnin segir að ákvörðun velferðarráðuneytisins og Sjúkratrygginga Íslands um að hafna umsóknum sérfræðilækna að rammasamningi sérfræðilækna megi að öllum líkindum jafna við brot á grundvallarmannréttindum landsmanna um aðgengi að heilbrigðisþjónustu óháð efnahag.

Alþingi hefur samþykkt breytingu á lögum um líffæraflutninga þannig að framvegis verður gert ráð fyrir að allir séu samþykkir brottnámi líffæris að sér látnum nema tilefni sé til að ætla annað. 54 þingmenn voru viðstaddir atkvæðagreiðslu um frumvarpið á Alþingi og greiddu allir atkvæði með samþykkt frumvarpsins nema Birgir Þórarinsson þingmaður Miðflokksins og Jón Þór Ólafsson þingmaður Pírata sem skiluðu ekki atkvæði.

Stjórn Læknafélags Íslands lýsir yfir þungum áhyggjum vegna stöðu sérhæfðrar heilbrigðisþjónustu utan sjúkrahúsa. Ein af meginstoðum þjónustunnar er samningur Læknafélags Reykjavíkur (LR) við Sjúkratryggingar Íslands (SÍ), en á honum byggist heilbrigðisþjónusta sjálfstætt starfandi sérfræðilækna við sjúklinga. Slíkan samning má rekja allt aftur til ársins 1909 við stofnun fyrsta sjúkrasamlags landsins.

Alma Möller, landlæknir ætlar að láta gera úttekt til að meta þörf fyrir taugalækna og aðgengi að þeim áður en hún tjáir sig um úrskurð velferðarráðuneytisins. Sjúkratryggingar synjuðu taugalækni um aðild að rammasamningi sérfræðinga og heilbrigðisráðuneytið staðfesti þá niðurstöðu.

Taugalæknir sem ekki fær aðild að rammasamningi sérfræðilækna stefnir enn að því að opna stofu á Íslandi. Hún segir að sjúklingarnir þurfi að óbreyttu að borga allt að fjórfalt meira en ella. Anna Björnsdóttir taugalæknir tilkynnti Sjúkratryggingum Íslands að hún hygðist hefja störf sem taugalæknir á stofu eftir að hún lýkur sérfræðinámi sínu í Bandaríkjunum. Sjúkratryggingar synjuðu henni um aðild að rammasamningi sérfræðinga, í takt við stefnumótun velferðarráðuneytisins. Ráðuneytið staðfesti þá niðurstöðu í úrskurði vegna stjórnsýslukæru Önnu.

Þórarinn Guðnason, formaður Læknafélags Reykjavíkur, segir að stjórnvöld þverbrjóti rammasamning um sérfræðilækningar með því að loka á nýja lækna. Þess vegna fái sjúklingar ekki þá þjónustu sem þeir þurfi. Hann segir að heilbrigðisráðuneytið hafi gerst dómari í eigin sök þegar það staðfesti þá ákvörðun Sjúkratrygginga að hleypa ekki nýjum lækni inn á rammasamning sérfræðilækna. Heilbrigðisyfirvöld neita að taka fleiri lækna á rammasamning um heilbrigðisþjónustu utan sjúkrahúsa vegna mikils kostnaðar við þjónustuna. Heilbrigðisráðuneytið staðfesti á dögunum synjun Sjúkratrygginga Íslands í máli taugalæknis sem vill opna stofu hérlendis.