Læknafélagið farið að lengja eftir COVID-álagsgreiðslunni

„Okkur er farið að lengja eftir svörum,“ segir Reynir Arngrímsson, formaður Læknafélagsins, við Fréttablaðið um þá staðreynd að ekki liggur fyrir hvernig ráðstafa eigi milljarði króna til heilbrigðisstarfsfólks vegna álags í kórónuveirufaraldrinum.

Sagt er frá því að rúmar sex vikur eru síðan Svandís Svavarsdóttir heilbrigðisráðherra gaf út að milljarðurinn færi í sérstakar álagsgreiðslur. Hún sagði þá að þær yrðu í formi eingreiðslna til starfsfólks í framlínunni á sjúkrahúsum, heilbrigðisstofnunum og í heilsugæslunni. Útfærslan yrði á hendi forstöðumanna heilbrigðisstofnana.

Fréttablaðið segir að engar upplýsingar sé að fá frá Landspítalanum aðrar en þær að málið sé í vinnslu.

Ragnar Freyr Ingvarsson, fyrrum yfirlæknir á COVID-19 göngudeild Landspítalans segir á Facebook-síðu sinni þann 2. júní að hann hafi fengið fjölda fyrirspurna frá starfsmönnum í COVID framlínunni um hvort að ekki eigi að fara að greiða út þennan milljarð sem lofaður var?

„Svona áður en næsta hrina fer í gang? Þekkir þú stöðu þessa máls, Svandís Svavarsdóttir?“ spyr hann heilbrigðisráðherra án svara.

Reynir segir mikilvægt að greiðslurnar nái ekki síður til starfsmanna í einkarekna kerfinu. Hann bendir á að hægt sé að horfa til Svíþjóðar, þar sem lög geri ráð fyrir sérstöku álagi á laun heilbrigðisstarfsmanna þegar neyðarástand ríki.

„Þar voru 120 prósent álagsgreiðslur ofan á laun þeirra, þannig að þetta voru rúmlega tvöföld laun sem fólk fékk á þessum tíma.“