Birna Jónsdóttir, röntgenlæknir og fyrrverandi formaður Læknafélags Íslands, er látin.
Birna Jónsdóttir, röntgenlæknir og fyrrverandi formaður Læknafélags Íslands, er látin. Hún lést 30. september 2026 á heimili sínu í Reykjavík.
Birna var fædd 6. október 1950, elst fimm barna Jóns Sigurðssonar bifreiðastjóra (1920-1990) og Lilju Maríu Petersen (1922-2009) læknis og kennara.
Birna ólst upp í Reykjavík og gekk í grunnskóla þar. Hún lauk stúdentsprófi frá Menntaskólanum við Hamrahlíð vorið 1970 og kandídatsprófi í læknisfræði frá Háskóla Íslands 1977. Sérnámi í röntgenlækningum lauk hún 1985 í Uppsölum í Svíþjóð og starfaði samhliða því á Akademiska-sjúkrahúsinu þar í borg.
Á kandídatsári starfaði hún á sjúkrahúsum í Reykjavík. Þá var hún í læknanámi sínu héraðslæknir í Búðardal og seinna á Húsavík. Á árunum 1985 til 1992 vann Birna á Borgarspítalanum og ár til viðbótar á Landakoti. Í félagi við aðra röntgenlækna stofnaði hún Röntgen Domus árið 1992, fyrirtæki á sviði myndgreininga, sem hún átti og rak með þeim til starfsloka árið 2018. Árið 2000 sinnti hún rannsóknum við Smithsonian-stofnunina í Bandaríkjunum. Hún var brautryðjandi í einkarekinni heilbrigðisþjónustu enda var henni annt um aðgengi sjúklinga að skilvirkri þjónustu. Hún beitti sér fyrir gæðum í heilbrigðiskerfinu og hafði forystu um að færa gögn á stafrænt form og í rafrænar sjúkraskrár.
Birna var virk í félagsstörfum í þágu lækna, sat í stjórn Læknafélags Íslands um árabil, var kjörin formaður félagsins fyrst kvenna árið 2007 og gegndi því embætti til ársins 2011. Hún var ötull talsmaður lækna, var farsæl í starfi og naut virðingar samstarfsmanna og sjúklinga.
Læknafélag Íslands sendir börnum, tengdabörnum, barnabörnum og öðrum ástvinum Birnu innilegar samúðarkveðjur. Birnu er minnst með miklu þakklæti fyrir læknisstörf hennar sem og fyrir mikilvæg félagsstörf í þágu lækna.