823 íslenskir læknar í 25 löndum
823 íslenskir læknar starfa nú í 25 löndum erlendis. Þetta kemur fram í nýju tölublaði Læknablaðsins. Þar er rætt við tíu lækna sem starfa víða. Meðal annars í Bretlandi, Danmörku, Hollandi, Svíþjóð, og Bandaríkjunum.
Fréttablaðið vitnar í Læknablaðið og ræðir við Reyni Arngrímsson, formann félagsins. Hann segir ýmsar skýringar á því hvers vegna svo margir starfa erlendis.
„Alveg fram á síðustu ár hafa nánast allir læknar, sem hafa menntað sig á Íslandi, farið erlendis og margir hverjir ílengst. Svo er verið að bíða eftir að það losni stöður hér á Íslandi í þeirra sérgreinum sem hafa komið upp,“ segir hann.
„Það er kannski svona meginskýringin á þessum fjölda,“ segir Reynir í samtali við Fréttablaðið.
Hér má lesa framhaldsfrétt Fréttablaðsins og hér finna upprunalegu fréttina í Læknablaðinu og viðtölin við læknana. Í Læknablaðinu segir Ferdinand Jónsson, geðlæknir í London, til að mynda frá því þegar hann smitaðist af COVID-19.
„Tveimur vikum eftir að lætin hófust fékk ég pestina sjálfur. Ég hef aldrei orðið eins veikur. Og maður hugsar um dauðann, í sínum litla súrefnissnauða heimi, einsemdina og það að treysta ekki. Hér hafa öldur brotnað af þunga,“ segir Ferdinand í blaðinu.
„Læknar eru þekktir sem lélegir sjúklingar. Ég hélt að ég væri skárri, vegna reynslu af langvinnum, alvarlegum veikindum. Svo var ekki. Ótti og afneitun hafa verið við völd.“ Sjá orð Ferdinands í Læknablaðinu hér.
Mynd/Læknablaðið