Forseti Evrópusamtaka lækna, CPME, er Konstanty Radziwill, heimilislæknir frá Varsjá en á síðasta aðalfundi var kjörtímabil stjórnar lengt úr 2 árum í 3 ár.
Með honum í stjórn sem varaforsetar 2010-2011  eru Frank Montgomery frá Þýskalandi, Milan Kubek frá Tékklandi, Jörg Pruckner frá Austurríki og Roland Lemye frá Belgíu. Undirrituð er enn gjaldkeri samtakanna og verður það út ári 2012. Nýr framkvæmdastjóri tók til starfa í fyrra, en það er Birgit Beger sem tók við af Lisette Tiddens-Engwirda. 

Undanfarið ár hefur starfsemi CPME verið í nokkuð föstum skorðum.  Eins og í fyrra hefur stjórnin hist mun sjaldnar en áður var og stuðst við fjarfundi í ríkum mæli. Á þann hátt hefur verið hægt að vinna markvisst að þeim verkefnum sem á döfinni eru hverju sinni auk þess sem kostnaði er haldið í lágmarki. Miklum sparnaði hefur verið náð með samhentu átaki framkvæmdastjóra og gjaldkera. Dregið hefur verið úr ferðakostnaði, og þannig hefur tekist að halda fleyinu á floti.

Aðildarlöndin eru 27. Árlegar greiðslur fara eftir nokkurra ára gömlu módeli. Þar er aðallega byggt á íbúafjölda landanna, læknafjölda og vergri landsframleiðslu en á aðalfundi í nóvember 2010 voru til umræðu breytingar á atkvæðavægi landanna, svok. weighted voting, þar sem þau lönd sem mest greiða til CPME fá meira vægi en áður, einkum hvað fjárhaginn snertir. Nefna má að Þýskaland  borgar um 28% heildarkostnaðar eða um 185.000 evrur og Bretland 19% sem eru 130.000 evrur. Fram að þessu hefur hvert land haft eitt atkvæði eins og algengast hefur verið meðal samtaka á borð við CPME, en þetta hefur smám saman verið að breytast í Evrópu. Eftir stendur þó að við kosningar verður áfram miðað við eitt land-eitt atkvæði.

Vinnulagi samtakanna var breytt. Í stað 4 undirnefnda voru stofnaðir tímabundnir vinnuhópar um verkefni sem upp koma hverju sinni. Fundir vinnuhópa eru aðallega símafundir eða tölvupóstsamskipti. Núverandi vinnuhópar eru 12 talsins og verkefnin fjölmörg. Sem dæmi má nefna öryggi sjúklinga, geðheilsa, næring, líffæragjafir, tóbaksnotkun, áfengisnotkun, forvarnir, vinnuafl í heilbrigðisþjónustu, vinnutímatilskipun ESB, heilbrigðisþjónustu yfir landamæri, viðskipti með lækningavörur, e-heilsu o.fl. o.fl.
Gert er ráð fyrir því að vinnuhópar um afmörkuð mál ljúki störfum þegar verkefni lýkur og  niðurstaðan verði afgreidd með ályktun eða stefnumörkun sem tekin er til afgreiðslu á aðalfundi. Næsti aðalfundur CPME verður haldinn í nóvember nk.
Mörgum verkefnum CPME er þó þannig háttað að vinnu við þau lýkur ekki svo glatt, sbr. vinnutímatilskipunina, öryggi sjúklinga og alls kyns samstarf Evrópulanda. Þetta nýja fyrirkomulag virðist þó gefast ágætlega.

Eftir að hafa fengið samþykkta ályktun um faglegt sjálfstæði lækna hef ég undanfarið unnið að stefnumörkun hvað varðar framsal á verkefnum í heilbrigðisþjónustu, á ensku kallað task shifting, með áherslu á hlutverk læknisins. Hlutverk læknis við að greina sjúkdóma og ákveða um meðferð er óumdeilt. Í því tilliti er mest um vert að gæta að öryggi sjúklinga og því þarf ákvörðun um að færa verkefni frá læknum til annarra heilbrigðisstétta að vera tekin af læknum en ekki t.d.stjórnvöldum án samráðs við lækna.

Katrín Fjeldsted
Fulltrúi LÍ í CPME